«Injil Muⱪǝddǝs» 

ɵzgǝrtiwetilgǝnmu?

Yeⱪinda bir musulman kixi Əysa Mǝsiⱨ muhlisidin (mǝsiⱨiy) bolƣan bir dosti bilǝn paranglixiwetip uningdin mundaⱪ dǝp soraptu: —

«Kixilǝr ⱪandaⱪ ⱪilƣanda Əysa-ǝlǝyⱨissalam (silǝr dǝp eytiwatⱪan Mǝsiⱨ-Ⱪutⱪuzƣuqi) toƣruluⱪ kɵprǝk bilǝlǝydu?».

Bu muhlis uning bu soaliƣa: —

«Meningqǝ siz «Yengi Əⱨdǝ»ni, yǝni «Injil» dǝp atalƣan Muⱪǝddǝs Kitabni oⱪusingiz bolidu. Bu kitabni muhlislar Əysa Mǝsiⱨni tonux üqün oⱪuydu. «Mǝsiⱨ» degǝn, Ⱪutⱪuzƣuqi ⱨǝm kǝlgüsi alǝmning Padixaⱨi demǝktur. Bu kitab siznimu intayin zor bǝhtkǝ erixtürǝlǝydu» dǝp jawab beriptu. Bu musulman ɵz dostining bu mǝsliⱨǝtini ⱪobul ⱪiptu wǝ keyin bir parqǝ muⱪǝddǝs Injilƣa igǝ boptu.

Ƣǝlitǝ yeri xuki, bǝzi musulmanlar Injildin guman ⱪilixidu. Mǝlum sǝwǝblǝr tüpǝylidin, ular ɵzlirini Injilni oⱪuxⱪa dǝwǝt ⱪilƣan Əysaning muhlisi bolƣan dostliridin muⱪǝddǝs Injilning ⱨǝⱪiⱪiy ixǝnqlik yaki ǝmǝsliki toƣruluⱪ soal sorixidu. Bir musulman bir ⱪetim mundaⱪ dǝp soriƣan: —

«Muⱪǝddǝs Injil hristi'anlar tǝripidin ɵzgǝrtilgǝnmu ǝmǝsmu?».

Yǝnǝ birsi:

«Muⱪǝddǝs Injil uluƣ xan-xǝrǝplik Ⱪur'an tǝripidin ǝmǝldin ⱪaldurulƣan yaki uning ornini Ⱪur'an igiligǝn ǝmǝsmu?» — dǝp soriƣan.

Yǝnǝ birsimu mundaⱪ degǝn: —

«Əysa jǝnnǝtkǝ qiⱪⱪan qaƣda uning muⱪǝddǝs Injilnimu billǝ elip qiⱪip kǝtkǝnlikini biz bilimiz. Silǝr oⱪuwatⱪan bu kitab ⱨǝⱪiⱪiy Injil ǝmǝs».

Bu muhlis muⱪǝddǝs Injil toƣruluⱪ pat-patla muxundaⱪ mǝsililǝrgǝ uqrap turƣaqⱪa, u ɵzining bǝzi musulman dostlirining muⱪǝddǝs Injil toƣruluⱪ nemixⱪa muxundaⱪ gumanda yürüwatⱪanliⱪ sǝwǝbini sürüxtǝ ⱪilixⱪa baxliƣan. Uzun ɵtmǝy, u musulmanlarning bu gumanlirining ɵz ustazliri tǝripidin kǝlgǝnlikini bayⱪiƣan. Qünki ɵz mǝⱨǝllisidiki mollilirining agaⱨlanduruxi bilǝn, Mǝsiⱨiylǝr biz bilǝn ortaⱪlaxmaⱪqi bolƣan Injilni rǝt ⱪiliximiz lazim, dǝp ⱪariƣan. Bu muhlis Islam dini molliliri bilǝn sɵⱨbǝtlixiwatⱪan qaƣlirida bǝzi mollilar uningƣa: —

«Uluƣ xan-xǝrǝplik Ⱪur'anda yezilƣandǝk, hristi'anlar ⱨazir oⱪuwatⱪan Injil ɵzgirip kǝtkǝn» deginidǝ, u axu mollilarning birigǝ mundaⱪ dǝp jawab bǝrgǝn: —

«Mollam, muⱪǝddǝs Injilning ɵzgǝrtiwetilgǝnlikigǝ munasiwǝtlik bolƣan birǝr ayǝtni Ⱪur'andin manga bayan ⱪilip bǝrsingiz, yaki kɵrsitip bǝrsingizqu? Mǝnmu ɵzüm üqün muxundaⱪ ispatni biliwalay».

U mollam uningƣa: —

«Ⱨazirning ɵzidǝ ⱨeqⱪandaⱪ ayǝtni ǝsliyǝlmidim», dǝp jawab bǝrdi. U yǝnǝ bu mǝsilǝ toƣruluⱪ birdǝm oyliniwalƣandin keyin, bu xu Mǝsiⱨ muhlisiƣa: —

«Mǝn uluƣ xan-xǝrǝplik Ⱪur'andin paydilinip andin sizgǝ xundaⱪ ayǝtlǝrni kɵrsitip ⱪoyayki, xuning bilǝn siz ɵz ⱪolingizdiki Injilning ⱨǝⱪiⱪiy Injil ǝmǝslikini bilip ⱪalisiz» — degǝn.

Biraⱪ u buni ispatliyalalmiƣan. Əmǝliyǝttǝ bu mollam Ⱪur'andin muⱪǝddǝs Injilning ɵzgirip kǝtkǝnlikini ispatlap berǝlǝydiƣan birǝr ayǝtni tapalmiƣanidi. Lekin bu kiqik wǝⱪǝning ɵzi Ⱪur'anda xundaⱪ ayǝt mǝwjut ǝmǝslikini toluⱪ ispatlap berǝlmǝydu, ǝlwǝttǝ. Bu muhlis muxundaⱪ sɵzlǝrni daim anglap turƣaqⱪa: —

«Ɵzüm Ⱪur'anni inqikilik bilǝn tǝpsiliy oⱪup bu sɵzlǝrning rast-yalƣanliⱪini tepip qiⱪay», dǝp oylidi. Gǝrqǝ bu muhlis ɵzining bayⱪiƣanliⱪini bu yǝrdǝ toluⱪ tǝpsilatliri bilǝn bayan ⱪilip berǝlmisimu, tɵwǝndiki ⱨǝⱪiⱪǝt sizni ⱪiziⱪturidu, dǝp oylaydu. Bolupmu ǝgǝr sizmu Əysaning muhlisi bolƣanlar oⱪuwatⱪan Injilning ⱨǝⱪiⱪiy ikǝnlikigǝ Ⱪur'an guman kǝltüridu dǝp ⱪarisingiz, tɵwǝndikilǝrni oⱪup beⱪing: —

(1) Ⱪur'an pat-patla muⱪǝddǝs Injil (xundaⱪla Tǝwrat wǝ Zǝbur) wǝ Mǝsiⱨiylǝr («Nasaralar») toƣruluⱪ tohtilidu.

(2) Ⱪur'anda Injilning yol baxliƣuqi ikǝnliki ⱨǝm uningda yoruⱪluⱪning barliⱪi bayan ⱪilinƣan. Sürǝ «Ma'idǝ» 46-ayǝt: —

«Ularning (yǝni bǝni-Israil pǝyƣǝmbǝrlirining) arⱪisidin ɵzidin ilgiri nazil ⱪilinƣan Tǝwratni (yǝni uning Alla tǝripidin nazil ⱪilinƣanliⱪini) etirap ⱪilƣuqi Əysa ibn Mǝryǝmni ǝwǝttuⱪ, uningƣa ⱨidayǝt bilǝn nurni ɵz iqigǝ alƣan Injilni ata ⱪilduⱪ, (Injil) ɵzidin ilgiri nazil ⱪilinƣan Tǝwratni etirap ⱪilƣuqidur (yǝni uningƣa muwapiⱪtur), tǝⱪwadarlarƣa ⱨidayǝt wǝ pǝnd-nǝsiⱨǝttur».

(3) Ⱪur'anda Injil pütün insanlarning yol baxliƣuqisi ikǝnliki bayan ⱪilinƣan. Sürǝ «Al-Imran» 3, 4-ayǝttǝ: —

«(I Muⱨǝmmǝd!) Ɵzidin ilgiriki kitablarni tǝstiⱪ ⱪilƣuqi ⱨǝⱪ kitabni (yǝni Ⱪur'anni) (Alla) sanga nazil ⱪildi. Ilgiri, kixilǝrgǝ (insanlarƣa) yol kɵrsǝtküqi ⱪilip Tǝwrat bilǝn Injilni nazil ⱪilƣan idi. Ⱨǝⱪ bilǝn batilni ayriƣuqi kitabni (yǝni barliⱪ samawi kitablarni) nazil ⱪildi...».

(4) Ⱪur'an Yǝⱨudiy wǝ Mǝsiⱨiylǝrning Muⱪǝddǝs Kitabning, yǝni Injilning wǝ Tǝwratning oⱪuƣuqiliri ikǝnlikini bayan ⱪilidu. Sürǝ «Bǝⱪǝrǝ», 113-ayǝttǝ: —

«Yǝⱨudiylar «Nasaralarning ⱨeqⱪandaⱪ asasi yoⱪ (yǝni ular toƣra dinda ǝmǝs)» dedi. Nasaralarmu: «Yǝⱨudylarning ⱨeqⱪandaⱪ asasi yoⱪ (yǝni ular toƣra dinda ǝmǝs)» dedi. Ⱨalbuki, ular Kitabni (yǝni Yǝⱨudiylar Tǝwratni, Nasaralar Injilni) oⱪuydu».

(Əmǝliyǝttǝ «Nasaralar» Tǝwratⱪa, Zǝburƣa ⱨǝm Injilƣa ixinidu, bǝzidǝ ularni «Kona Əⱨdǝ» ⱨǝm «Yengi Əⱨdǝ» dǝp ataydu).

(5) Ⱪur'anda «Mǝsiⱨiylǝr muⱪǝddǝs Injilƣa asasǝn «ⱨɵküm ⱪilix»i kerǝk» deyilgǝn. Sürǝ «Ma'idǝ» 47-ayǝt: —

«Ularning (yǝni bǝni-Isra'il pǝyƣǝmbǝrlirining) arⱪisidin ɵzidin ilgiri nazil ⱪilinƣan Tǝwratni «Yǝni uning Alla tǝripidin nazil ⱪilinƣanliⱪini» etirap ⱪilƣuqi Əysa ibn-Mǝryǝmni ǝwǝttuⱪ, uningƣa ⱨidayǝt bilǝn nurni ɵz iqigǝ alƣan Injilni ata ⱪilduⱪ, «Injil» ɵzidin ilgiri nazil ⱪilinƣan Tǝwratni etirap ⱪilƣuqidur «yǝni uningƣa muwapiⱪtur», tǝⱪwadarlarƣa ⱨidayǝt wǝ pǝnd-nǝsiⱨǝttur. Əⱨli Injillar (yǝni Nasaralar) Alla Injilda nazil ⱪilƣan ǝⱨkamlar boyiqǝ ⱨɵküm ⱪilsun, Alla nazil ⱪilƣan ayǝtlǝr boyiqǝ ⱨɵküm ⱪilmiƣanlar pasiⱪlardur».

(6) Islamiyǝtning pǝyƣǝmbiri Muⱨǝmmǝd Ⱪur'andin guman ⱪilƣan waⱪtida, Ⱪur'anning ɵzi uning «Muⱪǝddǝs Kitabning hǝlⱪi» (ǝrǝbqǝ «Əⱨl-al-Kitab», yǝni Yǝⱨudiy wǝ Mǝsiⱨiylǝr)din sorap beⱪixini tǝkitlǝydu. Sürǝ «Yunus» 94-ayǝttǝ: —

«Mubada sǝn biz sanga nazil ⱪilƣan kitabtin xǝklinidiƣan (xübⱨilinidiƣan, guman ⱪilidiƣan) bolsang, sǝndin ilgiri kitab oⱪuƣanlar («Əⱨl-al-kitab, yǝni Tǝwrat bilǝn Injil nazil ⱪilinƣan Yǝⱨudiylar wǝ Nasaralar)din sorap baⱪⱪin...».

(7) Ⱪur'anning ⱨeqⱪandaⱪ yeridǝ muⱪǝddǝs Injilning ɵzgǝrtiwetilgǝnliki kɵrsitilmigǝn.

Bizning Mǝsiⱨiy muhlis dostimiz muⱪǝddǝs Injilning tekistlirining mukǝmmǝllikini ⱪollaydiƣan Kur'andiki ispatlarƣa ⱪarap, heli bǝkla ⱨǝyran ⱪaldi. Xuning bilǝn u munularni oylidi: —

«Əgǝr nurƣunliƣan musulman dostlarning deginidǝk, muⱪǝddǝs Injil ɵzgirip kǝtkǝn bolsa, Ⱪur'an ⱪandaⱪmu mǝsiⱨiylǝrni «Muⱪǝddǝs Kitabning hǝlⱪi» wǝ «Muⱪǝddǝs Kitabning oⱪuƣuqiliri» dǝp bayan ⱪilsun? Injil ɵzgǝrtiwetilgǝn bolsa yaki ǝmǝldin ⱪaldurulƣan bolsa, wǝ yaki (nurƣunliƣan musulmanlarning eytⱪinidǝk) jǝnnǝtkǝ elip qiⱪip ketilgǝn bolsa, ⱪandaⱪlarqǝ Ⱪur'anda mǝsiⱨiylǝrni Injilƣa asasǝn «nazil ⱪilƣan ǝⱨkamlar boyiqǝ ⱨɵküm ⱪilsun» dǝp yezilidu? Ⱪur'anda ⱪandaⱪmu «mǝsiⱨiylǝr ɵzgǝrtiwǝtkǝn» bir Injilƣa, yaki «ǝmǝldin ⱪaldurulƣan» bir Injilƣa wǝ yaki «xu qaƣdiki mǝsiⱨiylǝrdǝ yoⱪ» bolƣan bir Injilƣa asasǝn «mǝsiⱨiylǝr ⱨɵküm ⱪilsun» dǝp eytilidu? Yǝnǝ ⱪandaⱪ ⱪilip, «Muⱪǝddǝs Kitabning hǝlⱪi» (Yǝⱨudiy wǝ Nasaralar)ning kitabi ɵzgirtilip kǝtkǝn bolsa, Ⱪur'anda yǝnǝ ǝgǝr Islamiyǝtning pǝyƣǝmbiri Muⱨǝmmǝd Ⱪur'andin gumanlansa, «Muⱪǝddǝs Kitabning hǝlⱪidin sorap baⱪsun» degǝn nǝsiⱨǝtlǝr uningƣa berilgǝn? Rast, mǝlum sǝwǝbtin Ⱪur'an mǝsiⱨiylǝrgǝ «ularning yolini ɵzgǝrtix» toƣruluⱪ nǝsiⱨǝt ⱪilƣan. Xundaⱪtimu, Ⱪur'anning ⱨeqⱪandaⱪ yeridǝ Mǝsiⱨiylǝr oⱪuwatⱪan muⱪǝddǝs Injilning ɵzgirip kǝtkǝnliki yaki uning insanlarning etiⱪad-ixǝnqisigǝ mas kǝlmǝydiƣanliⱪi bayan ⱪilinmiƣan. Ⱪur'anda mǝsiⱨiylǝrning bǝzi ⱪilƣanliri yaki etiⱪadi tǝnⱪid ⱪilinƣini bilǝn, bǝribir ularƣa «Injil boyiqǝ ⱨɵküm ⱪilsun» degǝn nǝsiⱨǝt dǝwǝt ⱪilinidu.

Tarihning ɵzi muxular toƣruluⱪ mol ispat bǝrmǝktǝ. Muxu kiqik kitabqidǝ xu ispatlarni tǝpsiliy berǝlmǝymiz, lekin Kona Əⱨdǝ (yǝni Tǝwrat-Zǝbur)diki ⱨǝr bir ⱪismidin Pǝlǝstindiki «Kumran» degǝn rayonda ⱪǝdimki kɵqürülmǝ nushilar tepilƣan. Bu ⱪol yazmilar asasǝn miladiyǝdin ilgiriki 3-2 ǝsirdǝ yezilƣan, dǝp ispatlanƣan (demǝk, ilgiriki kɵqürülmilǝrdin kɵqürülgǝn). Ular ⱨazir ⱪolimizda bar bolƣan Tǝwrat-Zǝburƣa op'ohxax (Tǝwrat-Zǝburning 39 ⱪismi miladiyǝdin ilgiriki 1800-405-yillar ariliⱪida yezilƣan)

Injilƣa kǝlsǝk, kolap qiⱪilƣan yaki monastirlarda saⱪlap ⱪaldurulƣan, miladiyǝdin keyinki 1-ǝsir, 2-, 3-, 4-ǝsirdiki nurƣunliƣan kɵqürülmǝ nushilar bar (yǝnǝ ilgiriki nushiliridin kɵqürülüp yezilƣan. Injilning ǝslidiki 27 ⱪismi miladiyǝdin kiyinki 52-96-yillar ariliⱪida yezilƣan). Bu ⱪǝdimki kɵqürülmilǝr, ⱪolimizda bar ⱨazirⱪi Injilning ɵzgǝrmigǝnlikini yaki ɵzgǝrtiwetilmigǝnlikini toluⱪ ispatlaydu. Siz ⱨǝrⱪandaⱪ tarihiy kutuphanidin xu pakitlarni ɵzingiz eniⱪliyalaysiz.

Tɵwǝndǝ, bǝzidǝ munazirǝ bolidiƣan birnǝqqǝ ayǝtlǝr üstidǝ bir-ikki eƣiz gǝp ⱪilayli. Sürǝ «Al-imran», 78-ayǝt: —

«Ulardin (yǝni Yǝⱨudiylardin) bir türkümi kitabta bolmiƣan nǝrsilǝrni, silǝrning kitabta bar ikǝn dǝp oylixinglar üqün, tillirini ǝgri-bügri ⱪilip oⱪuydu wǝ uni Alla tǝripidin nazil bolƣan, dǝydu. .... ular bilip turup Alla namidin yalƣan oⱪuydu».

Əgǝr birsi «Bu ayǝt Yǝⱨudiylarning kitabni ɵzgǝrtkǝnlikini kǝrsǝtmǝmdu?» — dǝp sorisa, ǝmǝliyǝttǝ, xu ayǝt dǝl xuning ǝksini ispatlaydu. Qünki muxu yǝrdǝ, Kitab ɵzgǝrtkǝnlikini ǝmǝs, bǝlki «bir türküm» adǝmlǝr (bǝzi Yǝⱨudiylar) oⱪuƣan waⱪtida hata tǝlǝppuz bilǝn mǝnisini ɵz mǝⱪsiti üqün ⱪayriwelixini kɵrsitidu. Ularning ⱪolidiki kitab ⱨaman Tǝwrattin ibarǝttur.

Sürǝ «Nisa», 45-ayǝt: —

«Yǝⱨudiylarning iqidǝ Kitabning (yǝni Tǝwratning) sɵzlirini ɵzgǝrtiwetidiƣanlarmu bar, ular «Sɵzüngni angliduⱪ, boysunmiduⱪ, bizgǝ ⱪulaⱪ sal, biz sanga ⱪulaⱪ salmaymiz» — dǝydu, dinƣa tǝnǝ ⱪilix yüzisidin «ra'ina» degǝn sɵzni tillirini ǝgri ⱪilip eytidu».

Bu ayǝtmu yuⱪiriⱪi misalƣa ohxax, yǝnǝ «bir türküm» adǝmlǝrning tillirini «ǝgri ⱪilip» hata tǝlǝppuz bilǝn Tǝwratni oⱪuydiƣanliⱪini kɵrsitidu, halas. Ohxax süridiki tɵwǝndiki ayǝtmu (46-ayǝt) buningƣa ispat beridu: —

«I kitab berilgǝnlǝr! (yǝni Yǝⱨudiylar)... Ɵzünglardiki kitabni (yǝni Tǝwratni) tǝstiⱪ ⱪilidiƣan, bizgǝ nazil ⱪilƣan kitabⱪa (yǝni Ⱪur'anƣa) iman kǝltürünglar»

— demǝk, «ɵzünglardiki kitab», dǝl ularning ⱪolida bolƣan, ǝyni ɵzgǝrtilmigǝn Tǝwrattur.

Sürǝ «Ma'idǝ», 13-ayǝtningmu yuⱪiridiki ikki ayǝtkǝ ohxax mǝnisi bar, yuⱪirida nǝⱪil kǝltürülgǝn dǝl xu süridiki 46-47 ayǝtlǝrmu xuni ispatlaydu.

Sürǝ «Kǝⱨf», 27-ayǝttǝ: — «Allaning sɵzlirini ⱨeq kixi ɵzgǝrtǝlmǝydu» deyilidu. Muxu ayǝt hulasǝ bolsun.

Xundaⱪ turuⱪluⱪ, musulmanlar nemixⱪa Mǝsiⱨ muhlislar oⱪuwatⱪan muⱪǝddǝs Injilning ⱨǝⱪiⱪǝt ikǝnliki toƣruluⱪ ƣǝlitǝ gumanlarda bolup yürixidu? Injilning ⱨǝⱪiⱪǝt ikǝnlikidin guman ⱪilƣan musulmanlarning Ⱪur'anning Injil toƣruluⱪ bǝrgǝn ispatiƣa sǝl ⱪariƣanliⱪi ǝmǝliyǝttǝ ularning Ⱪur'anƣa sǝl ⱪariƣanliⱪi ǝmǝsmu? «Injil ɵzgǝrtilip kǝtkǝnidi» dǝp ǝng qing turuwalƣan adǝmlǝrni Ⱪur'an ⱨǝm Ⱪur'anda deyilgǝn bǝzi tǝstiⱪlarƣa bina'ǝn «ǝng az hǝwǝr tapⱪan adǝmlǝr» degili bolmasmu? 

Xundaⱪ ⱪilip, muxu ixtin keyin, bizning Mǝsiⱨiy dostimiz ɵzining musulman aka-uka, aqa-singil ⱪerindaxliri bilǝn Injil toƣruluⱪ ortaⱪlixixⱪa dawamliⱪ tirixixⱪa ilⱨamlandi. Xundaⱪtimu, u ɵzining musulman dostliri bilǝn muxu ispatlar arⱪiliⱪ talax-tartix ⱪilixni halimidi, bǝlki pǝⱪǝtla ularning ɵzlirining Ⱪur'andin muxu ispatlarni bir kɵrüp qiⱪixni ⱨǝm muxu ispatlar bilǝn ɵzlirining gumanlirini selixturuxni tǝwsiyǝ ⱪilixni bap kɵrdi. Muxu ispatlarning ɵz dostlirining Injilni oⱪuxiƣa yardǝm berixini, xundaⱪla ularning Injildiki hux hǝwǝr üstidǝ qongⱪur oylinip beⱪixini pütün ⱪǝlbi wǝ du'a bilǝn ümid ⱪildi.

Dostum, bizning mǝsiⱨiy dostimiz bolsa muⱪǝddǝs Injilning xerin-xǝrbitidin tetip baⱪⱪan Əysa Mǝsiⱨning nurƣunliƣan muhlislirining biridur. Ular üqün Injilning hux hǝwiri ⱨǝsǝldin tatliⱪ bolup, adǝmning yürikini yayritidu. Uning hux hǝwiri ular üqün xunqǝ huxallinarliⱪ ixki, ular hux hǝwǝrni behillar altunni saⱪliƣandǝk ⱨǝrgizmu pinⱨan saⱪliƣusi yoⱪ. Ularning hojayini, yǝni Rǝbbi bolƣan Əysa Mǝsiⱨ dǝl Ɵzi jǝnnǝtkǝ ⱪaytip ketixidin sǝl burun Ɵzining barliⱪ muhlisliriƣa Uning hux hǝwirini pütün insanlar bilǝn ortaⱪlixixni buyruƣan. Xuningdin keyin, Hudaning uluƣ Kitabi bolƣan Injil pütün insaniyǝt üqün Hudaning hux hǝwiri bolup ⱪaldi. Kimmu Ⱨǝmmigǝ Ⱪadir Hudaning Ɵz kalam-sɵzini, yǝni muⱪǝddǝs Tǝwrat ⱨǝm Injilni burundin tartip saⱪlap keliwatⱪanliⱪini rǝt ⱪilalisun? U Ɵz kalam-sɵzining mǝnggü saⱪlinip kelixigǝ ⱪadirdur! Amin! Muⱪǝddǝs Injilning hux hǝwirini oⱪuƣiningizda Ⱨǝmmigǝ Ⱪadir Hudaƣa du'a, mǝdⱨiyǝlǝr bilǝn tǝxǝkkur eyting!

«Sɵzliringgǝ erixip, ularni yǝwaldim; sɵzliring ⱨǝm meni xadlandurƣuqi wǝ ⱪǝlbimning huxalliⱪi bolƣan».

(Tǝwrattiki «Yǝrǝmiya» 15-bab, 16-ayǝt).

(Əysa Mǝsiⱨ dedi...)

«Asman-zemin yoⱪilidu, biraⱪ Mening sɵzlirim ⱨǝrgiz yoⱪalmaydu!»

(Injil «Luⱪa», 21-babtin)

«Bǝrⱨǝⱪ, bǝrⱨǝⱪ, Mǝn silǝrgǝ xuni eytip ⱪoyayki, sɵzümni anglap, Meni ǝwǝtküqigǝ ixǝngǝn ⱨǝrkim mǝnggülük ⱨayatⱪa erixkǝn bolidu; u adǝm soraⱪⱪa tartilmaydu, bǝlki ɵlümdin ⱨayatliⱪⱪa ɵtkǝn bolidu»

(Injil, «Yuⱨanna» 5-bab 24-ayǝt).

«— Silǝr nemixⱪa Meni «Rǝb! Rǝb!» dǝysilǝryu, biraⱪ silǝrgǝ eytⱪanlirimƣa ǝmǝl ⱪilmaysilǝr? Əmisǝ, Mening aldimƣa kelip, sɵzlirimni anglap ǝmǝl ⱪilƣan ⱨǝrkimning kimgǝ ohxiƣanliⱪini silǝrgǝ kɵrsitip berǝy. U huddi qongⱪur kolap, ulini ⱪoram taxning üstigǝ selip ɵy salƣan kixigǝ ohxaydu. Kǝlkün kǝlgǝndǝ, su eⱪimi u ɵyning üstigǝ zǝrb bilǝn urulƣini bilǝn, uni midir-sidir ⱪilalmidi, qünki u puhta selinƣan. Lekin sɵzlirimni anglap turup, ǝmǝl ⱪilmaydiƣan kixi bolsa, ⱪuruⱪ yǝrning üstigǝ ulsiz ɵy salƣan kixigǝ ohxaydu. Kǝlkün eⱪimi xu ɵyning üstigǝ uruluxi bilǝn u ɵrülüp kǝtti; uning ɵrülüxi intayin dǝⱨxǝtlik boldi!»

(Injil, «Luⱪa» 6-bab, 46-49-ayǝt).

«Qünki Huda dunyadiki insanlarni xu ⱪǝdǝr sɵyiduki, Ɵzining birdinbir yeganǝ Oƣlini pida boluxⱪa bǝrdi. Mǝⱪsiti, Uningƣa etiⱪad ⱪilƣan ⱨǝrbirining ⱨalak bolmay, mǝnggülük ⱨayatⱪa erixixi üqündur»

(Injil, «Yuⱨanna» 3-bab 16-ayǝt).

«Tirilix wǝ Ⱨayatliⱪ Mǝn Ɵzümdurmǝn; Manga etiⱪad ⱪilƣuqi kixi ɵlsimu, ⱨayat bolidu; wǝ ⱨayat turup, Manga etiⱪad ⱪilƣuqi ǝbǝdil’ǝbǝd ɵlmǝs»

(Injil, «Yuⱨanna» 11-bab 25-ayǝt).

«Mǝnggülük ⱨayat xuki, birdinbir ⱨǝⱪiⱪiy Huda — Seni wǝ Sǝn ǝwǝtkǝn Əysa Mǝsiⱨni tonuxtin ibarǝttur» 

(Injil, «Yuⱨanna» 17-bab 3-ayǝt).

«Mǝn Mǝsiⱨ toƣrisidiki bu hux hǝwǝrdin ⱨǝrgiz hijil bolmaymǝn! Qünki u uningƣa ixǝngüqilirining ⱨǝmmisini, aldi bilǝn Yǝⱨudiylarni, andin keyin Yǝⱨudiy ǝmǝslǝrni nijatⱪa erixtüridiƣan Hudaning küq-ⱪudritidur!»

(Injil, rosul Pawlus Rimliⱪ jama'ǝttikilǝrgǝ yazƣan mǝktup («Rimliⱪlarƣa»), 1-bab 16-ayǝt).

(Izaⱨat — yuⱪiriⱪi Ⱪur'andiki ayǝtlǝrni Muⱨǝmmǝd Saliⱨ tǝrjimǝ ⱪilƣan 1986-yili 11-ayda Millǝtlǝr Nǝxriyati tǝripidin nǝxir ⱪilinƣan Ⱪur'an kǝrimning uyƣurqǝ tǝrjimisidin elindi).

«Internet»tin paydilinidiƣan bolsingiz, «www.mukeddeskalam.com»din Muⱪǝddǝs Kitabtiki barliⱪ ⱪisimlarni qüxürgili bolidu.